Eric從9月20日返-11月11日走,在呢段時間內我們去過日本北海道5天遊為慶祝我們的38週年記念,享受情況都算ok,沒什麽不愉快事情發生！好感恩！ 曾經深深相信 我們之間... 總有一天會牽引著, 深深愛戀到永遠,直到白頭。 這麼的相信了好多年 好多年 好多年 好多年都以為這就會是永遠 ... 以為等你到退休後, 你和我可走完這一輩子,可是... 常常想著你是會珍惜我和這個家, 就能微笑得很甜 日夜期待著等你回來,牽著手的那一天 你的眼中只有我們的回憶 曾經堅定的相信能夠 深深愛戀到永遠 永 遠 永遠.... 但到現在,還是這樣！我應要夢醒了,不要再發夢下去！ 該怎麼辦呢？巳一把年紀還能做什麽？好迷惘！ 不如試試..對自己好啲,做自己喜歡做的事情,可以嗎？《希望能做到》

不經不覺Eric明天回來了！他是在19.08.2011走嘅,相距一個月零兩日又返嚟！之前我都好緊張佢留在HK的時間,但慢慢我對他巳是絕望了！不想再花心思去記住佢啲事情了！衹記得佢今年兩個大節日都冇喺度過！【中秋節同端午節】既然佢選擇咁做,由得佢我冇辦法！ 我哋之間感情越嚟越淡,都唔知可以維繫到幾耐？我明佢都好辛苦,要兩邊走,所以,免得過我都唔比壓力佢,隨便佢喜歡點就點啦！但最近稍有不依佢的話就口口聲聲講唔啱就散band啦！呢句係我最唔鍾意聽到嘅說話！我巳警告過佢,唔好咁隨便講呢啲說話。一係唔講,一講就做,我就認為係咁喇！唔知今次返嚟又會點呢？式目以待！

原來我巳有年幾兩年冇上blog喇！原因係乜？我自己都唔知！可能係因為玩咗facebook冇時間又或者係冇乜心情掛。 原因係我在2010年9月隻左腳無端端痛,起初唔知咩事,睇咗好多醫生都病因不明？後來去照咗磁力共震先知道《半月板軟組織流失》但據醫生所講...即使係''半月板軟組織流失''都不應痛得那麽厲害的。最後遇到一位揑骨正筋醫師,睇咗9次巳好番9成！慢慢...到現在行路巳經冇乜痛喇,但都巳不及之前。 足足巳有一年冇返過瑜珈喇,好蝕呀！唉！想起之前嗰間瑜珈中心比咗4年會費衹玩咗兩年就執咗笠,到呢間比咗2年會費,個膝頭哥又有事冇返咗成年,莫非叫我以後都唔好再Join！算把啦！就當破財擋災好了！

時間真係過得好快, 轉眼好快又一年喇！聖誕好快就到啦!回想今年都冇乜特別,係喺週年紀念後28.10去咗幾天旅行咁啫！都算好架喇! 嘻! 做人要知足先得! 但回來後無幾日即〔11月11日〕Eric 就話要返上去!《預咗架喇》之不過係.......佢問我攞 passport 話要去''泰國''喎! 跟住同佢嘈起上嚟!問佢係咪同嗰個人去,佢冇答! 我明嘅! 佢走後,我好唔開心!但諗深一層〔如果佢唔係要問我攞passport 的話,我都唔會知啦！佢出得去就可以去邊就去邊架喇!〔理唔到又唔到我理〕放開啲啦!〔自己不斷咁勸自己〕唔好諗咁多喇!人唔錫你,自己就要錫自己先得呀! 就係咁......不斷要鼓勵住自己才可挨到今時今日! 唔易架! 努力,加油向前望,希望.......明天會更好!

今日係8月29日晚上......phillip會同我去睇''張信哲演唱會''在紅館! 聽講話衹演一場,所以phillip一早網上訂票! 講起呢個仔又真係幾乖,每次我想嘅嘢而佢又做得到的話,好多時都有滿足我嘅!當諗深一層以前須然苦,但都算有番啲安慰!

記得上個月29082009Eric 離開屋企上大陸。轉眼間....今日回來了! 啱啱一個月!呢個月時間過得好快而什麽都做唔倒.可能天氣實在太熱喇!《足足最熱嗰日有成37%度呀》提唔起勁去做!每天都是懶洋洋咁度過!最辛苦嘅係晚晚瞓唔倒,眼光光咁直到天亮才有倦意!於是一睡就成個上午時間冇晒.好多嘢都做唔倒咁就一日過去喇! 希望早日可以找到方法去改善啦!

剛剛收到來電,老公話日期13.06.09時間10:00左右早上到達深圳。問我到時會唔會上去meet 佢.我說..........諗吓先啦,我仲未好番咁話！收線後在想.......冇乜心情上去,但又恐怕唔上佢又唔知會點諗！唉！我覺得好辛苦呀！因我唔識點做好！ 唯有到時再算吧！

在這個月內接二連三咁發生啲不愉快事！首先係媽咪忽然發高燒而入院。媽咪巳經入咗醫院成20日有多喇！雖然.....啲燒係退咗,但仲要檢查身體各部份,所以還要繼續留醫。昨天巳同佢轉去私家醫院,好等佢住得舒服啲同方便我哋去探佢！每次見到媽咪三义神經痛時,講唔到野同食唔到野嘅時候,想幫又幫唔到嗰種感覺好難受！《希望媽咪早日康復！》感謝上天保祐！其次係我感冒！食咗成個星期抗生素藥另我成個人都軟乃乃同紛睡而又乜都做唔到！去唔到探媽咪,就連整野食都有因難！好彩我兩個仔都好乖,佢哋放工就會輪流去探婆婆！返嚟就講比我聽婆婆今日咁咁咁......點點點呀！咁囉！再其次嘅係......事幹多！當親戚朋友知道媽咪入院都想探望吓,而我的弟妹就不準。所以各人都揾我打聽發生咩事,點解唔去得探呀？我唯有找個藉口捥拒咗！《希望所有唔開心嘅事快啲可過去啦！》

 07.05.2009.今早大概8點多9點左右,當我還未睡醒時,卻給老公換衫的聲音嘈醒咗.當時我問....''你咁早換衫去邊呀？''他回答.....''我幫你攞把菜刀去磨囉！''當時我心想~~【又找藉口出去喇!佢邊有咁好會幫我做啲咁嘅事吖!】話口未完佢就返嚟話揾唔倒個磨刀師傅喎！比我估中.佢係揾藉口出去啫!於是我就整早餐食!如是者.....媽咪打電話過嚟,傾咗一陣話要我買麵包比佢.我臨出門時.....佢就同我講......〔我今日上上海喇!〕當時我冇回應佢就出咗去！再當我回家時,他還在家執嘢準備出去!我就同佢講''小心身體,一路平安呀!''那時我個心是很酸,很痛的呢!「又有誰知」!

p.s.明天就是......母親節喇！願天下間所有偉大的母親>>>>母親節快樂!

 今朝一早online見到老公留言話17.03.09早機返,當時心想《又要適應另一個生活節奏喇》所以要好好地利用呢幾日時間去街,上網喇！加因佢返黎我就週身唔得閒架啦！一日三餐''買''洗''煮''巳用盡我所有時間,就連私人時間都難有.《因我做野好慢》唯有夜啲瞓才可擁有少少空間上網同朋友msn.我啲朋友都巳知道的,所以在這段時間內,衹有我得閒時才可找他們.而他們就唔會揾我！我老公係要好有規律性嘅,定時飲食,定時作息.而我就相對簡單得多,隨隨便便就可以喇！好多時就因小小事就爭吵,冇意思！《例如:我早瞓就瞓唔著》而佢一食飽就可以瞓咁囉！當佢瞓醒見我未瞓,就會話我。《凌晨一兩點》唉!!總知大家生活習慣有偏差,咪要適應囉！冇計！